的士司機一席話

的士加價的第一天，早上，因趕時間而乘搭的士，亦因而得以聆聽的士司機的一席話。以下內容，有聞必錄，不作詮釋，只在括號內略作補充。的士司機簡稱司機。

司機：唉，今朝第一枝旗收咗舊價添。

問： 啊，乜唔係今日起價咩？

司機：一吓唔記得[查看新舊價對照表]，咪照錶收囉。

問：今日覺唔覺少咗客？

司機：其實司機唔想加價，係車主申請加價啫。

問：加價你收入唔係多咗咩？

司機：車主又好快會加番車租啫，[加價對我]有乜用吖。[市民對的士服務不滿]的士呢行好惡攪架，你點加強監管先？優質的士？都係嗰班司機啫。你信唔信一個司機轉咗揸第二架車之後，即刻變成優質(司機)呢？重有噃，六百個優質的士牌，只係批俾三個專營權，每個專營權二百個牌，喂，一個牌幾百萬喎，二百個講緊幾多錢呀，唔係財團邊度有咁多錢去投？不過佢批都會批俾啲親政府親建制嘅財團啦。你睇吓王維基[申請電視牌照]，預備好晒又點，就係唔批。

問：全港的士牌總共有幾多個呢？

司機：一萬八千個。不過佢地財團唔怕蝕。慢慢[優質的士]數目重會增加，整整吓原來啲車主同車行就冇得做，佢咃就係要控制晒[市場]，到時佢加價加幾多你都要坐。地鐵咪咁囉，賺錢都加價，但你有得唔坐咩。

問：係咪似癲價投地呢？

司機：都係官商勾結啦。地產商去上便開會講好晒數，你高價賣地我照樣肯投地，只要到時你放番啲北水落來香港買樓，貴買貴賣，一樣賺大錢，政府同地產商豬籠入水，你上唔到車咩，佢唔理你架。

目的地到達，付了新車費，下車，的士司機一席話亦告一段落。短短的談話，簡要地勾劃了交通、政經、地產、管治、民生的現況。近日流行一句話：perception is reality，的士司機一席話，應該是他的 perception了，也是 reality嗎？